- 489 -

1416 März 25. St. Denis.

Ludwig von gotis gnaden herczog yn Slesien.
Vnser sunderliche gunst czuuor liber her Alczenaw. Wir thuen euch czu wissen, das wir gesant haben der stad czu Legnicz geld, das (sy) sullen eynen zemys lassen hawen vff den torm. Dorumme bete wir euch, das ir dorczu helft vnd rat vnd besehet, ap her hoch genug sey, vnd möchte her ane schaden höher werden, das sege wir gerne, also das her yo das dach vnd den zemys getragen mochte, alz wir entworffen senden vnd meister Rewschener wol weis; ouch red mit der stad, das sy dem steynmeczczen, den wir her aws senden ecz wo eyn beheltnisse schaffen ader ym tagelon geben vnd ym me gehulfen schaffen, wen hers eyn leyne nicht geendin mochte, vnd helft ir ouch dorczu mit stoyne furn vnd mit ander hantlangunge, so ir beste moget, wen wirs der stad dorumme befoln haben, das sy bessir awsrichtunge dorczu haben, wen yr; ouch besehet vm holcz zu gesperre, wo man das dirkrigen mochte; ouch bete wir euch, das ir reden wollit mit dem lande czu Legnicz, geistlich vnd werltlich, vnd bet dy von vnser wegen, als wir yn ouch vorschreben haben, das sy wellen lassen steyne füren zu eyner gruntfesten, wen ir leuthe am müssegisten woren, wen wir, ap got wil, eczwas meynen zu bawen, wen vns got her heym gehilft. Ouch wil vnser herre, der konig, yo das wir das alde haws sinte Hedwigen wedir bawen sullen; dorumme furscht, wo man czymmer dorczu gehaben mochte, wen her spricht, her welle vns geldis genug dorczu geben, vnd lat yo steyne furen desin somyr, wen ir dirkennet, das dy leuthe aller mtissegeste seyn. Ouch bete wir euch, das yr die risse, dy an dem selben alden hawse seyn, beste vormawem last, das man merken moge, ap ys vp eyn newes wedir reissen welle. Gegebin zu sinte Dionisio am montage noch dem Palm tage.

Orig. Kgl. Bibl. z. Berl. Ms. Boruss. f. 567 No. 51. — Gedruckt: Schirrmacher: Ambrosius Bitschen, der Stadtschreiber von Liegnitz und der liegn. Lehnsstreit, Progr. d. Kgl. Ritter-Akad. 1866 S. 7.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866